ಮಂಗಳೂರು;ಕನ್ನಡ ಮತ್ತು ಹಿಂದಿ ಭಾಷೆಯಲ್ಲಿ ನಿರ್ಮಾಣಗೊಂಡಿರುವ ವೈಲ್ಡ್ ಟೈಗರ್ ಸಫಾರಿ ಚಿತ್ರದ ಮೊದಲ ಹಾಡನ್ನು ಬಿಡುಗಡೆ ಮಾಡಲಾಯಿತು. ಈ ಬಿಡುಗಡೆ ಕಾರ್ಯಕ್ರಮದಲ್ಲಿ ಬಾಲಿವುಡ್ ಹಿರಿಯ ನಟ, ನೃತ್ಯ ನಿರ್ದೇಶಕರಾದ ಜಾವೆದ್ ಜಾಫ್ರಿ, ಟೆರೇನ್ಸ್ ಹಾಗೂ ಅನೇಕರು ಭಾಗಿಯಾಗಿದ್ದರು.
ಇನ್ನು ಚಿತ್ರದ ನಿರ್ದೇಶಕ ಚಂದ್ರಮೌಳಿ ಅವರು ಮಂಗಳೂರಿನ ಹೋಟೇಲ್ವೊಂದರಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿ,
ಚಿತ್ರದ ಟೀಸರ್ಗೆ ಕನ್ನಡ ಮತ್ತು ಹಿಂದಿ ಪ್ರೇಕ್ಷಕರಿಂದ ಭಾರೀ ಪ್ರತಿಕ್ರಿಯೆ ವ್ಯಕ್ತವಾದ ಹಿನ್ನೆಲೆ ಚಿತ್ರದ ಬಗ್ಗೆ ನಿರೀಕ್ಷೆಗಳು ಇನ್ನಷ್ಟು ಹೆಚ್ಚಾಗಿವೆ. ವೈಲ್ಡ್ ಟೈಗರ್ ಸಫಾರಿ ಸಾಮಾನ್ಯ ಪ್ರೇಕ್ಷಕರ ಹೃದಯವನ್ನು ಸ್ಪರ್ಶಿಸುವ ಚಿತ್ರವಾಗಲಿದೆ ಎಂಬ ನಮ್ಮ ನಂಬಿಕೆಯನ್ನು ಬಲಪಡಿಸಿದೆ ಅಂತ ಹೇಳಿದ್ದಾರೆ.
ವಿ.ಕೆ. ಫಿಲ್ಮ್ಸ್ ಬ್ಯಾನರ್ ಅಡಿಯಲ್ಲಿ ಸಿನಿಮಾ ನಿರ್ಮಾಣ ಮಾಡಿರುವ ವಿನೋದ್ ಕುಮಾರ್ ಅವರು ಮಾತನಾಡಿ, ಸಿನಿಮಾ ತುಂಬಾ ಭಿನ್ನವಾಗಿ ಮೂಡಿಬಂದಿದೆ. ಇದು ನನ್ನ ಎರಡನೇ ಸಿನಿಮಾ. ಮೊದಲ ಸಿನಿಮಾ ಕರಾವಳಿ ಬಿಡುಗಡೆ ಹಂತದಲ್ಲಿದೆ ಎಂದ್ರು.
ಇನ್ನು ಜಾವೆದ್ ಜಾಫ್ರಿ ಹಾಗೂ ಟೆರೆನ್ಸ್ ಮಾತಾಡಿ, ಈ ಸಿನಿಮಾದಲ್ಲಿ ನನ್ನ ಶಿಷ್ಯರಾದ ಧರ್ಮೇಶ್ ಮತ್ತು ಸುಶಾಂತ್ ಪೂಜಾರಿ ನಟಿಸಿದ್ದಾರೆ ಅವರಿಗೆ ಬೆಂಬಲ ನೀಡಲು ನಾವಿಲ್ಲಿ ಬಂದಿದ್ದೇವೆ ಎಂದ್ರು.
ಸುದ್ದಿಗೋಷ್ಠಿಯಲ್ಲಿ ನಟರಾದ ಧರ್ಮೇಶ್, ಸುಶಾಂತ್ ಪೂಜಾರಿ, ಚಂದ್ರಮೌಳಿ, ನಿರ್ದೇಶಕ ನಿಮಿಕಾ, ನಟಿ ಪ್ರಿಯಾಂಕಾ, ಜಾವೇದ್, ವಿನೋದ್, ಶಿತಿಲ್ ಪೂಜಾರಿ,ದೀಕ್ಷಿತ್ ಸೇರಿದಂತೆ ಅನೇಕರು ಉಪಸ್ಥಿತರಿದ್ದರು.
ಮೊದಲ ಹಾಡಿನ ಬಗ್ಗೆ ;
ಬಿಡುಗಡೆಯಾಗುತ್ತಿರುವ ಮೊದಲ ಹಾಡು ಕಥೆಯ ಪ್ರಮುಖ ಭಾಗವಾಗಿರುವ ಹೈ-ಎನರ್ಜಿ ಸೆಲೆಬ್ರೇಷನ್ ಟ್ರ್ಯಾಕ್ ಆಗಿದೆ. ಸಾಮಾನ್ಯ ವಾಣಿಜ್ಯ ಚಿತ್ರಗಳಂತೆ ನಾಯಕನೇ ಪಾರ್ಟಿ ಹಾಡನ್ನು ಮುನ್ನಡೆಸುವ ಪದ್ಧತಿಗೆ ಬದ್ಧವಾಗದೇ, ವೈಲ್ಡ್ ಟೈಗರ್ ಸಫಾರಿ ತನ್ನ ಕಥೆಯ ಅಗತ್ಯಕ್ಕೆ ತಕ್ಕಂತೆ ಈ ಹಾಡನ್ನು ರೂಪಿಸಿದೆ.
ಈ ಹಾಡಿನಲ್ಲಿ ಅಮರ್ ಶೆಟ್ಟಿ ಮತ್ತು ವರ್ಮಾ ಎಂಬ ಪಾತ್ರಗಳು ಪ್ರಮುಖವಾಗಿ ಕಾಣಿಸಿಕೊಂಡಿದ್ದು, ಅವನ್ನು ಸುಶಾಂತ್ ಮತ್ತು ಧರ್ಮೇಶ್ ಜೀವಂತವಾಗಿ ಮೂಡಿಸಿದ್ದಾರೆ. ಇಬ್ಬರೂ ವೃತ್ತಿಪರ ನೃತ್ಯಗಾರರಾಗಿದ್ದರೂ, ಅವರ ನೃತ್ಯ ಪ್ರದರ್ಶನಗಳು ಪಾತ್ರದ ಸ್ವಭಾವಕ್ಕೆ ತಕ್ಕಂತೆ ಇರಲು ವಿಶೇಷ ಕಾಳಜಿ ವಹಿಸಲಾಗಿದೆ. ಪ್ರತಿಯೊಂದು ಹೆಜ್ಜೆಯೂ ಪ್ರತೀಕಾರ ಕಥೆಯ ತೀವ್ರತೆಯನ್ನು ಪ್ರತಿಬಿಂಬಿಸುವಂತೆ ವಿನ್ಯಾಸಗೊಳಿಸಲಾಗಿದೆ. ಅವರ ಶಕ್ತಿ, ಭಾವಭಂಗಿ ಮತ್ತು ಪರದೆ ಮೇಲೆ ಇರುವ ಹಿಡಿತ ಈ ಹಾಡಿಗೆ ವಿಶಿಷ್ಟ ಮೆರುಗು ನೀಡುತ್ತದೆ.
ಈ ಹಾಡಿನಲ್ಲಿ ಕಾಣಿಸಿಕೊಂಡಿರುವ ಪ್ರಿಯಾಂಕಾ ಅವರೂ ಉತ್ಸಾಹಭರಿತ ಮತ್ತು ಮನಮೋಹಕ ಅಭಿನಯ ನೀಡಿದ್ದಾರೆ. ಅವರ ಲಾವಣ್ಯ, ಆತ್ಮವಿಶ್ವಾಸ ಮತ್ತು ಪರದೆ ಮೇಲಿನ ಚೈತನ್ಯ ಈ ಸೆಲೆಬ್ರೇಷನ್ ಟ್ರ್ಯಾಕ್ಗೆ ಹೆಚ್ಚುವರಿ ಆಕರ್ಷಣೆಯನ್ನು ತಂದಿದೆ. ಈ ಹಾಡಿಗೆ ಸಂಗೀತ ನಿರ್ದೇಶನವನ್ನು ಸಚಿನ್ ಬಸ್ರೂರ್ ಮಾಡಿದ್ದಾರೆ. ಶಕ್ತಿಶಾಲಿ ಹೂಕ್ ಲೈನ್ ಹೊಂದಿರುವ ಈ ಹಾಡು ಪ್ರೇಕ್ಷಕರ ಮನಸ್ಸಿನಲ್ಲಿ ಉಳಿಯುವಂತಿದೆ.
ಹಾಡಿನ ಸಾಹಿತ್ಯವನ್ನು ಪ್ರಮೋದ್ ಮರವಂತೆ ರಚಿಸಿದ್ದು, ಮಾಸ್ ಶೈಲಿಯ ಉತ್ಸಾಹ ಮತ್ತು ಸಂಭ್ರಮದ ವಾತಾವರಣಕ್ಕೆ ತಕ್ಕಂತೆ ಪರಿಣಾಮಕಾರಿಯಾಗಿ ಪದಗಳನ್ನು ಜೋಡಿಸಿದ್ದಾರೆ.
ನೃತ್ಯ ಸಂಯೋಜನೆಯನ್ನು ದೀಕ್ಷಿತ್ ಕುಮಾರ್ ನಿರ್ವಹಿಸಿದ್ದು, ಪಾತ್ರಾಧಾರಿತ ಮತ್ತು ಉತ್ಸಾಹಭರಿತ ಹೆಜ್ಜೆಗಳನ್ನು ಅತ್ಯುತ್ತಮವಾಗಿ ರೂಪಿಸಿದ್ದಾರೆ. ಕಥೆಯ ಮೌಲ್ಯಗಳಿಗೆ ಧಕ್ಕೆಯಾಗದಂತೆ ಪ್ರತಿಯೊಂದು ಚಲನೆಯನ್ನು ವಿನ್ಯಾಸಗೊಳಿಸಿರುವುದು ಹಾಡಿಗೆ ನೈಜತೆ ಮತ್ತು ತೀವ್ರತೆಯನ್ನು ನೀಡಿದೆ.
ಐಶ್ವರ್ಯ ರಂಗರಾಜನ್ ಅವರ ಗಾನ ಈ ಹಾಡಿಗೆ ವಿಶೇಷ ಮೆರಗು ತಂದಿದೆ. ಅವರ ಶಕ್ತಿಯುತ ಮತ್ತು ಚೈತನ್ಯಭರಿತ ಧ್ವನಿ ಹಾಡಿನ ಉತ್ಸಾಹವನ್ನು ಹೆಚ್ಚಿಸಿ ಮಾಸ್ ಆಕರ್ಷಣೆಯನ್ನು ನೀಡುತ್ತದೆ.
ಈ ಸೆಲೆಬ್ರೇಷನ್ ಟ್ರ್ಯಾಕ್ ವೈಲ್ಡ್ ಟೈಗರ್ ಸಫಾರಿ ಚಿತ್ರದ ವೈಲ್ಡ್ ಎನರ್ಜಿ ಮತ್ತು ಧಾಟಿಯನ್ನು ಪ್ರತಿಬಿಂಬಿಸುತ್ತದೆ. ಇದು ಪ್ರೇಕ್ಷಕರನ್ನು ತೊಡಗಿಸಿಕೊಳ್ಳುವಂತೆ ಮಾಡುತ್ತಿದ್ದು, ಚಿತ್ರದ ಆಕ್ಷನ್ ಮತ್ತು ಭಾವನಾತ್ಮಕ ಪ್ರಯಾಣಕ್ಕೆ ಭದ್ರ ನೆಲೆ ಸೃಷ್ಟಿಸುತ್ತದೆ.
ಚಿತ್ರತಂಡವು ಮಾಧ್ಯಮ ಹಾಗೂ ಪ್ರೇಕ್ಷಕರ ನಿರಂತರ ಬೆಂಬಲಕ್ಕೆ ಹೃತ್ಪೂರ್ವಕ ಧನ್ಯವಾದಗಳನ್ನು ತಿಳಿಸಿ, ಮುಂದಿನ ದಿನಗಳಲ್ಲಿ ಇನ್ನಷ್ಟು ರೋಚಕ ಮಾಹಿತಿಗಳನ್ನು ಹಂಚಿಕೊಳ್ಳಲು ಕಾತರವಾಗಿದೆ.