UN networks
ದೇರಳಕಟ್ಟೆ: ದೇರಳಕಟ್ಟೆಯ ಫಾದರ್ ಮುಲ್ಲರ್ ಹೋಮಿಯೋಪಥಿ ವೈದ್ಯಕೀಯ ಕಾಲೇಜು ಇಲ್ಲಿ ಸೆ. 16 ಮತ್ತು 17 ರಂದು ಫಾದರ್ ಮುಲ್ಲರ್ ಸಭಾಂಗಣದಲ್ಲಿ 25ನೇ ವಾರ್ಷಿಕ ರಾಷ್ಟ್ರೀಯ ಹೋಮಿಯೋಪಥಿ ಸಮ್ಮೇಳನ – “ಇಂಪೆಟಸ್’22,” ನಡೆಯಲಿದೆ ಎಂದು ಫಾದರ್ ಮುಲ್ಲರ್ ಚಾರಿಟೇಬಲ್ ಸಂಸ್ಥೆ ನಿರ್ದೇಶಕ ವಂ. ರಿಚರ್ಡ್ ಅಲೋಶಿಯಸ್ ಕುವೆಲ್ಲೊ ಹೇಳಿದ್ದಾರೆ.
ಅವರು ಬುಧವಾರ ದೇರಳಕಟ್ಟೆಯ ಫಾದರ್ ಮುಲ್ಲರ್ಸ್ ಹೋಮಿಯೋಪತಿ ಕಾಲೇಜು ಕಾನ್ಫರೆನ್ಸ್ ಹಾಲ್‍ನಲ್ಲಿ ಆಯೋಜಿಸಿದ ಸುದ್ಧಿಗೋಷ್ಠಿಯಲ್ಲಿ ಮಾಹಿತಿ ನೀಡಿದರು.
ನಿರಂತರವಾಗಿ ಬೆಳೆಯುತ್ತಿರುವ ಹೋಮಿಯೋಪಥಿ ಶಿಕ್ಷಣ ಮತ್ತು ಸಂಶೋಧನೆಯ ಕ್ಷೇತ್ರದಲ್ಲಿ ಪ್ರಸ್ತುತ ಅಭಿವೃದ್ಧಿಶೀಲ ಪ್ರವೃತ್ತಿಗಳ ಜೊತೆ ಉಳಿಯಲು ಕಾಲೇಜು ಸಾಂಪ್ರಾದಾಯಿಕವಾಗಿ ವಾರ್ಷಿಕ ಸಮ್ಮೇಳನಗಳನ್ನು ಆಯೋಜಿಸುತ್ತಿದೆ. ಕೋವಿಡ್ ಸಾಂಕ್ರಾಮಿಕದ ಕಾರಣ ನಡೆಯದ ಸಮ್ಮೇಳನ ಈಗ ಎರಡು ವರ್ಷಗಳ ನಂತರ ‘ಇಂಪೆಟಸ್ – 2022’ – ‘ಪ್ರಕ್ರಿಯೆಯನ್ನು ಯಶಸ್ಸಿಗೆ ಪ್ರೇರೇಪಿಸುತ್ತದೆ’ ಎಂಬ ವಿಚಾರದಲ್ಲಿ ಆಯೋಜಿಸಿದೆ. ಎರಡು ದಿನಗಳಲ್ಲಿ ನಡೆಯಲಿರುವ ಈ ರಾಷ್ಟ್ರೀಯ ಹೋಮಿಯೋಪಥಿ ಸಮ್ಮೇಳನದಲ್ಲಿ ಅಂತರಾಷ್ಟ್ರೀಯ ಖ್ಯಾತಿಯುಳ್ಳ ತಜ್ಞ ಹೋಮಿಯೋಪಥಿ ವೈದ್ಯರುಗಳಾದ ಡಾ. ಶೇಕರ್ ಅಲ್‍ಗುಂಡ್ಗಿ, ಡಾ. ಎನ್. ಮದನ್, ಹಾಗೂ ಡಾ. ಎಸ್ ಇಲಾಂಗೊ ಇವರು ಅವರ ಪರಿಣತಿ ಕ್ಷೇತ್ರದಿಂದ ಪ್ರಬಂಧವನ್ನು ಮಂಡಿಸಲಿದ್ದಾರೆ ಹಾಗೂ ಹೊಸ ಪ್ರತಿಭೆಗಳಿಗೆ ಹೋಮಿಯೋಪಥಿಯ ಬಗ್ಗೆ ವಿಷಯ ಮಂಡನೆ ಮಾಡಲು ಮುಕ್ತ ವೇದಿಕೆಯನ್ನು ನೀಡಲಾಗುವುದು. 25ನೇ ರಾಷ್ಟ್ರೀಯ ಹೋಮಿಯೋಪಥಿ ಸಮ್ಮೇಳನವನ್ನು ದೇರಳಕಟ್ಟೆಯ ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಉಪಕುಲಪತಿ ಪೆÇ್ರ. ಡಾ. ಸತೀಶ್ ಕುಮಾರ್ ಭಂಡಾರಿ ಉದ್ಘಾಟಿಸಲಿರುವರು. ಫಾದರ್ ಮುಲ್ಲರ್ ಚಾರಿಟೇಬಲ್ ಸಂಸ್ಥೆ ಕಂಕನಾಡಿ ಇದರ ನಿರ್ದೇಶಕ ವಂ. ರಿಚರ್ಡ್ ಅಲೋಶಿಯಸ್ ಕುವೆಲ್ಯೊ ಅಧ್ಯಕ್ಷತೆ ವಹಿಸಲಿದ್ದಾರೆ ಎಂದರು.
ಫಾದರ್ ಮುಲ್ಲರ್ ಹೋಮಿಯೋಪಥಿ ವೈದ್ಯಕೀಯ ಮಹಾವಿದ್ಯಾಲಯ ಮತ್ತು ಆಸ್ಪತ್ರೆ ಆಡಳಿತಾಧಿಕಾರಿ ವಂ. ರೋಶನ್ ಕ್ರಾಸ್ತಾ, ಮಾತನಾಡಿ ಸಮಾರಂಭದಲ್ಲಿ ಸಮ್ಮೇಳನದ ಸ್ಮರಣಿಕೆ ಬಿಡುಗಡೆ ಮತ್ತು ಫಾದರ್ ಮುಲ್ಲರ್ ಹೋಮಿಯೋಪಥಿ ಸಂಶೋಧನಾ ಬುಲೆಟಿನ್‍ನ ಪರಿಚಯಾತ್ಮಕ ಸಂಪುಟ ಬಿಡುಗಡೆ ನಡೆಯಲಿದೆ. ಇದರ ಜೊತೆ ಫಾದರ್ ಮುಲ್ಲರ್ ಹೋಮಿಯೋಪಥಿ ಫಾರ್ಮಸಿಟಿಕಲ್ ಡಿವಿಜನ್‍ನಲ್ಲಿ ವಿವಿಧ ಸುಗಂಧಗಳಲ್ಲಿ ಹೊಸದಾಗಿ ತಯಾರಿಸಲಾದ ಶಾಲೋಮ್ ಪೌಡರ್‍ನ್ನು ಬಿಡುಗಡೆ ನಡೆಯಲಿದೆ ಎಂದರು.
ಫಾದರ್ ಮುಲ್ಲರ್ ಹೋಮಿಯೋಪಥಿ ವೈದ್ಯಕೀಯ ಮಹಾವಿದ್ಯಾಲಯದ ಪ್ರಾಂಶುಪಾಲ ಡಾ. ಇ.ಎಸ್.ಜೆ. ಪ್ರಭು ಕಿರಣ್, ಫಾದರ್ ಮುಲ್ಲರ್ ಹೋಮಿಯೋಪಥಿ ವೈದ್ಯಕೀಯ ಮಹಾವಿದ್ಯಾಲಯದ ಉಪಪ್ರಾಂಶುಪಾಲ ಡಾ. ವಿಲ್ಮಾ ಮೀರಾ ಡಿ’ಸೋಜ, ವೈದ್ಯಕೀಯ ಅಧೀಕ್ಷಕ ಡಾ. ಗಿರೀಶ್ ನಾವಡ ಯು. ಕೆ., ಹೋಮಿಯೋಪಥಿ ಸಮ್ಮೇಳನ – ಇಂಪೆಟಸ್ 2022 ಸಂಘಟನಾ ಕಾರ್ಯದರ್ಶಿ ಡಾ. ವಿವೇಕ್ ಶಕ್ತಿಧರನ್, ಮಾದ್ಯಮ ಸಮಿತಿಯ ಸಂಯೋಜಕ ಡಾ. ಬ್ಲ್ಯಾನಿ ಲೋಬೊ ಉಪಸ್ಥಿತರಿದ್ದರು.