ಮಂಗಳೂರು: ಕರಾವಳಿಯ ಗಂಡುಕಲೆ ಯಕ್ಷಗಾನ ಇದೀಗ ಭಾಷೆಯ ಗಡಿಯನ್ನು ದಾಟಿ ದೇಶದ ವಿವಿಧ ಭಾಗಗಳಲ್ಲೂ ತನ್ನ ಕಲಾ ವೈಭವವನ್ನು ಪಸರಿಸುತ್ತಿದೆ. ಇದಕ್ಕೆ ಸಾಕ್ಷಿಯಾಗಿ ಪಂಜಾಬ್‌ನ ಚಂಡೀಗಢದಲ್ಲಿ ಹಿಂದಿ ಭಾಷೆಯಲ್ಲಿ ‘ಶ್ರೀದೇವಿ ಮಹಾತ್ಮೆ’ ಯಕ್ಷಗಾನ ಪ್ರದರ್ಶನಗೊಂಡಿದ್ದು, ಕನ್ನಡೇತರ ಪ್ರೇಕ್ಷಕರಿಗೆ ಕರಾವಳಿಯ ಸಾಂಪ್ರದಾಯಿಕ ಕಲೆಯ ಪರಿಚಯ ಮಾಡಿಕೊಟ್ಟಿದೆ.
‘ಏಕ್ ಭಾರತ್ ಶ್ರೇಷ್ಠ ಭಾರತ್’ ಉಪಕ್ರಮದಡಿ ಚಂಡೀಗಢ ಆಡಳಿತ ಆಯೋಜಿಸಿದ್ದ ಸಾಂಸ್ಕೃತಿಕ ಕಾರ್ಯಕ್ರಮದಲ್ಲಿ ಮಂಗಳೂರಿನ ಯಕ್ಷಧ್ರುವ ಪಟ್ಲ ಫೌಂಡೇಶನ್ ಟ್ರಸ್ಟ್ ತಂಡವು ಈ ಪ್ರದರ್ಶನ ನೀಡಿತು. ಟ್ರಸ್ಟ್‌ನ ಸ್ಥಾಪಕಾಧ್ಯಕ್ಷ ಪಟ್ಲ ಸತೀಶ್ ಶೆಟ್ಟಿ ಅವರ ನೇತೃತ್ವದಲ್ಲಿ ನಡೆದ ಕಾರ್ಯಕ್ರಮವು ಯಕ್ಷಗಾನದ ವೈಶಿಷ್ಟ್ಯವನ್ನು ಅನ್ಯಭಾಷಿಕರಿಗೂ ತಲುಪಿಸುವ ಪ್ರಯತ್ನವಾಗಿ ಗಮನ ಸೆಳೆಯಿತು.
ಚಂಡೀಗಢದ ಸೆಕ್ಟರ್ 18ರ ಟ್ಯಾಗೋರ್ ಥಿಯೇಟರ್‌ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ದುರ್ಗಾದೇವಿಯು ಮಹಿಷಾಸುರನನ್ನು ಸಂಹರಿಸುವ ಪೌರಾಣಿಕ ಕಥೆಯನ್ನು ಯಕ್ಷಗಾನದ ಹಾಡು, ಸಂಭಾಷಣೆ, ಸಂಗೀತ, ಆಕರ್ಷಕ ವೇಷಭೂಷಣ ಹಾಗೂ ಮನಮೋಹಕ ಅಭಿನಯದ ಮೂಲಕ ಪ್ರಸ್ತುತಪಡಿಸಲಾಯಿತು. ಕರಾವಳಿಯ ಯಕ್ಷಗಾನವನ್ನು ಹಿಂದಿ ಭಾಷಿಕ ಪ್ರೇಕ್ಷಕರಿಗೂ ಅರ್ಥವಾಗುವಂತೆ ಮಾಡಲು ಹಾಡುಗಳು ಮತ್ತು ಸಂಭಾಷಣೆಗಳನ್ನು ಹಿಂದಿಗೆ ಅಳವಡಿಸಲಾಗಿತ್ತು. ಯಕ್ಷಗಾನದ ಸಾಂಪ್ರದಾಯಿಕ ರಂಗಶೈಲಿಯನ್ನು ಉಳಿಸಿಕೊಂಡು ಭಾಷೆಯ ಮೂಲಕ ಪ್ರೇಕ್ಷಕರೊಂದಿಗೆ ಬೆರೆಯುವಂತೆ ಮಾಡಿದ್ದು ಈ ಪ್ರದರ್ಶನದ ವಿಶೇಷವಾಗಿತ್ತು. ಪ್ರದರ್ಶನಕ್ಕೆ ಸಿದ್ಧತೆ ನಡೆಸುವ ಸಂದರ್ಭದಲ್ಲಿ ಕಲಾವಿದರು ಹಿಂದಿ ಸಂಭಾಷಣೆಗಳ ಉಚ್ಚಾರಣೆ, ಅರ್ಥವಿವರಣೆ ಮತ್ತು ಅಭಿನಯದ ಕುರಿತು ವಿಶೇಷ ಅಭ್ಯಾಸ ನಡೆಸಿದ್ದರು. ಹಿಂದಿ ರೂಪಾಂತರಕ್ಕೆ ಸಂಬಂಧಿಸಿದ ಕವನಗಳನ್ನು ಸರ್ಪಂಗಳ ಈಶ್ವರ ಭಟ್ ಅವರು ರಚಿಸಿದ್ದರು.ಈ ಕುರಿತು ಮಾತನಾಡಿದ ಪಟ್ಲ ಸತೀಶ್ ಶೆಟ್ಟಿ, ಹಿಂದಿ ಭಾಷೆಯಲ್ಲಿ ಯಕ್ಷಗಾನ ಪ್ರದರ್ಶಿಸಲು ಕಲಾವಿದರು ಸಂಭಾಷಣೆಗಳ ಉಚ್ಚಾರಣೆ, ಅರ್ಥ ಮತ್ತು ಅಭಿನಯದ ಬಗ್ಗೆ ತರಬೇತಿ ಪಡೆದು ಅಭ್ಯಾಸ ನಡೆಸಿದ್ದರು ಎಂದು ತಿಳಿಸಿದ್ದಾರೆ. ಅಗತ್ಯ ಸಿದ್ಧತೆಗಳೊಂದಿಗೆ ತಂಡವು ಚಂಡೀಗಢದಲ್ಲಿ ಪ್ರದರ್ಶನ ನೀಡಿದೆ ಎಂದು ಅವರು ವಿವರಿಸಿದ್ದಾರೆ. ಕಾರ್ಯಕ್ರಮದಲ್ಲಿ ಪಂಜಾಬ್ ರಾಜ್ಯಪಾಲ ಹಾಗೂ ಕೇಂದ್ರಾಡಳಿತ ಪ್ರದೇಶ ಚಂಡೀಗಢದ ಆಡಳಿತಾಧಿಕಾರಿ ಗುಲಾಬ್ ಚಂದ್ ಕಟಾರಿಯಾ ಅವರು ಮುಖ್ಯ ಅತಿಥಿಯಾಗಿ ಭಾಗವಹಿಸಿದ್ದರು.ಯಕ್ಷಗಾನದ ವರ್ಣರಂಜಿತ ವೇಷಭೂಷಣ, ಶಕ್ತಿಯುತ ಅಭಿನಯ, ಸಂಗೀತ ಮತ್ತು ವಿಶಿಷ್ಟ ಕಥನ ಶೈಲಿಯು ಉತ್ತರ ಭಾರತದ ಪ್ರೇಕ್ಷಕರಿಗೆ ಕರಾವಳಿಯ ಕಲಾ ಪರಂಪರೆಯನ್ನು ಪರಿಚಯಿಸಿತು. ಹಿಂದಿ ಭಾಷೆಯಲ್ಲಿ ಕಥೆ ಮತ್ತು ಸಂಭಾಷಣೆಗಳನ್ನು ಪ್ರಸ್ತುತಪಡಿಸಿದ್ದರಿಂದ ಪ್ರೇಕ್ಷಕರಿಗೆ ಕಥೆಯೊಂದಿಗೆ ಸುಲಭವಾಗಿ ಬೆರೆಯಲು ಸಾಧ್ಯವಾಯಿತು. ಚಂಡೀಗಢದಲ್ಲಿ ಪ್ರದರ್ಶನ ನೀಡಿದ ಬಳಿಕ ಯಕ್ಷಗಾನ ತಂಡವು ನವದೆಹಲಿಯ ಕರ್ನಾಟಕ ಸಂಘದಲ್ಲಿಯೂ ಕಾರ್ಯಕ್ರಮವನ್ನು ಪ್ರಸ್ತುತಪಡಿಸಿತು. ಚಂಡೀಗಢದ ಪ್ರದರ್ಶನದ ಸಂಪೂರ್ಣ ವೆಚ್ಚವನ್ನು ಅಲ್ಲಿನ ಆಡಳಿತವೇ ಭರಿಸಿತ್ತು ಎಂದು ಲಭ್ಯವಾದ ಮಾಹಿತಿಯಲ್ಲಿ ತಿಳಿಸಲಾಗಿದೆ.ಭಾಷೆ ಬದಲಾದರೂ ಯಕ್ಷಗಾನದ ಮೂಲ ಸೊಗಸು, ಪೌರಾಣಿಕ ಕಥನ ಮತ್ತು ರಂಗಪ್ರದರ್ಶನದ ವೈಶಿಷ್ಟ್ಯವನ್ನು ಉಳಿಸಿಕೊಂಡು ಹಿಂದಿಯಲ್ಲಿ ಪ್ರದರ್ಶನ ನೀಡಿರುವುದು ಗಮನಾರ್ಹವಾಗಿದೆ. ‘ಏಕ್ ಭಾರತ್ ಶ್ರೇಷ್ಠ ಭಾರತ್’ ಉಪಕ್ರಮದಡಿ ನಡೆದ ಈ ಪ್ರಯತ್ನವು ಕರಾವಳಿಯ ಸಾಂಪ್ರದಾಯಿಕ ಕಲೆಯನ್ನು ದೇಶದ ವಿವಿಧ ಭಾಷಿಕ ಸಮುದಾಯಗಳಿಗೆ ಪರಿಚಯಿಸುವುದರ ಜೊತೆಗೆ, ಭಾಷಾ ವೈವಿಧ್ಯದ ನಡುವೆಯೂ ಭಾರತೀಯ ಕಲಾಪ್ರಕಾರಗಳು ಜನರನ್ನು ಬೆಸೆಯಬಲ್ಲವು ಎಂಬುದನ್ನು ಸಾರಿದೆ.