UNNEWS NETWORKS
ಉಳ್ಳಾಲ: ಮಂಕಿ ಫಾಕ್ಸ್ ಡಿಎನ್ ಎ ವೈರಾಣುಗಳಿಂದ ಸಂಭವಿಸುತ್ತಿದ್ದು, ರೋಗಿಯೊಡನೆ ನಿಕಟ ಸಂಪರ್ಕ ಮತ್ತು ಸೋಂಕಿತ ಪ್ರಾಣಿಗಳಿಂದ ಸಹ ಹರಡುವುದು. ಗಂಟಲು ದ್ರವ ಅಥವಾ ಚರ್ಮದ ನೀರ್ಗುಳ್ಳೆ ದ್ರವದಿಂದ ಪಿಸಿಆರ್ ವಿಧಾನದಿಂದ ಪೂನಾದ ವೈರಾಲಜಿ ಪ್ರಯೋಗಾಲಯದಲ್ಲಿ ಸೋಂಕು ಪತ್ತೆಹಚ್ಚಬಹುದು ಎಂದು ಯೆನೆಪೋಯ ವೈದ್ಯಕೀಯ ವಿದ್ಯಾಲಯದ ಅಣುಜೀವಿ ವಿಭಾಗದ ಪ್ರಾಧ್ಯಾಪಕ ಡಾ| ವಿದ್ಯಾ ಪೈ ತಿಳಿಸಿದರು.
ಅವರು ನಿಟ್ಟೆ ಪರಿಗಣಿತ ವಿಶ್ವವಿದ್ಯಾಲಯದ ಕೆ.ಎಸ್ ಹೆಗ್ಡೆ ವೈದ್ಯಕೀಯ ವಿದ್ಯಾಲಯದಲ್ಲಿ ಮಂಕಿ ಫಾಕ್ಸ್ ಕುರಿತ ವಿಚಾರ ಕಮ್ಮಟದಲ್ಲಿ ಭಾಗವಹಿಸಿ ಮಾತನಾಡಿದರು.
ಪ್ರಾಥಮಿಕವಾಗಿ ಆಫ್ರಿಕಾದಲ್ಲಿ ಮಾತ್ರ ಕಂಡುಬರುತ್ತಿದ್ದ ಮಖಿ ಫಾಕ್ಸ್ ರೋಗ, ಇತ್ತೀಚೆಗೆ ಹಲವು ದೇಶಗಳಲ್ಲಿ ಆತಂಕಕಾರಿಯಾಗಿ ಹರಡುತ್ತಿದೆ. ಭಾರತದಲ್ಲಿಯೂ ಕಾಲಿಟ್ಟಿರುವುದರಿಂದ ಆರೋಗ್ಯ ಕ್ಷೇತ್ರವನ್ನು ಅಣಿಯಾಗಿರಿಸಲು ಕಮ್ಮಟದ ಅಗತ್ಯತೆ ಇದೆ ಎಂದರು.
ಕಸ್ತೂರ್ಬಾ ವೈದ್ಯಕೀಯ ವಿದ್ಯಾಲಯದ ಪ್ರಾಧ್ಯಾಪಕಿ ಡಾ| ದೀಪಕ್ ಮಡಿ ಮಾತನಾಡಿ, ಜ್ವರ, ಚರ್ಮದಲ್ಲಿ ನೀರ್ಗುಳ್ಳೆ, ಕುತ್ತಿಗೆಯಲ್ಲಿ ಗ್ರಂಥಿ ಊತ ಮುಂತಾದ ಲಕ್ಷಣಗಳೊಂದಿಗೆ ರೋಗ ಕಾಣಿಸಿಕೊಳ್ಳುತ್ತದೆ. ವಿದೇಶ ಪ್ರಯಾಣ ಅಥವಾ ರೋಗಿಯ ಸಂಪರ್ಕಕ್ಕೆ ಬಂದು ೨೧ ದಿನಗಳಲ್ಲಿ ಮೇಲಿನ ಲಕ್ಷಣಗಳು ಕಾಣಿಸಿ, ಬೇರ್ಯಾವುದೇ ರೋಗಗಳು ಪತ್ತೆಯಾಗದಿದ್ದಲ್ಲಿ ಮಂಕಿಫಾಕ್ಸ್ ಪರೀಕ್ಷೆ ನಡೆಸುವುದು ಸೂಕ್ತ ಎಂದರು. ಭಾರತದಲ್ಲಿ ಲಕ್ಷಣ ಆಧಾರಿತ ಚಿಕಿತ್ಸೆ ಮಾತ್ರ ಲಭ್ಯವಿದೆ. ೧೯೮೦ರ ಮುಂಚೆ ಸ್ಮಾಲ್ ಫಾಕ್ಸ್ ಲಸಿಕೆ ಪಡೆದವರಿಗೆ ಸ್ವಲ್ಪ ಪ್ರಮಾಣದ ರೋಗ ನಿರೋಧಕ ಶಕ್ತಿ ಇರಲಿದೆ ಎಂದರು.
ಯೆನೆಪೋಯ ವೈದ್ಯಕೀಯ ವಿದ್ಯಾಲಯದ ಚರ್ಮರೋಗ ವಿಭಾಗ ಮುಖ್ಯಸ್ಥ ಡಾ| ಮಂಜುನಾಥ ಶೆಣೈ, ಕಸ್ತೂರ್ಬಾ ವೈದ್ಯಕೀಯ ವಿದ್ಯಾಲಯದ ಸಾಮಾಜಿಕ ವೈದ್ಯ ಶಾಸ್ತ್ರ ವಿಭಾಗದ ಸಹಪ್ರಾಧ್ಯಾಪಕ ಡಾ| ನಿತಿನ್ ಕುಮಾರ್, ಕ್ಷೇಮ ಪ್ರಾಧ್ಯಾಪಕ ಡಾ| ವಿಮಲ್ ಕುಮಾರ್, ಡಾ| ತನ್ಮಯ್ ಭಟ್, ಡಾ| ನಂಜೇಶ್ ಕುಮಾರ್, ತಜ್ಞವೈದ್ಯರ ಸಂಘದ ಪದಾಧಿಕಾರಿಗಳಾದ ಡಾ| ಶಯಾಮ ಪ್ರಕಾಶ್ ಕೆ., ಹಾಗೂ ಡಾ| ಸುಹೈಬ್ ಎ ಉಪಸ್ಥಿತರಿದ್ದರು.
ಡಾ| ಸುಧೀಂದ್ರ ರಾವ್ ಎಂ. ಸ್ವಾಗತಿಸಿದರು. ಡಾ| ಅಧಿತಿ ಕೆ. ನಿರೂಪಿಸಿದರು. ಡಾ| ಗಿರೀಶ್ ಬಿ.ಎಸ್ ವಂದಿಸಿದರು.