ಸೋಮೇಶ್ವರ ಪಂಚಾಯತ್ ನಲ್ಲಿ ಇ.ವಿ.ಎಂ. ಮತ್ತು ವಿ.ವಿ.ಪ್ಯಾಟ್ ಪ್ರಾತ್ಯಕ್ಷಿಕೆ

UN NETWORKS

ಸೋಮೇಶ್ವರ : ಸೋಮೇಶ್ವರ ಗ್ರಾಮದ ಗ್ರಾಮ ಪಂಚಾಯತ್ ಸಭಾಂಗಣದಲ್ಲಿ ಬುಧವಾರ ಮುಂಬರುವ ಲೋಕಸಭಾ ಚುನಾವಣೆಯ ಪೂರ್ವ ತಯಾರಿಯಾಗಿ ನಾಗರಿಕರಿಗೆ ಇ.ವಿ.ಎಂ. ಮತ್ತು ವಿ.ವಿ. ಪ್ಯಾಟ್ ಯಂತ್ರದ ಬಗ್ಗೆ ಪ್ರಾತ್ಯಕ್ಷಿಕೆ ಕಾರ್ಯಕ್ರಮ ಆಯೋಜಿಸಲಾಗಿತ್ತು.

ಕಳೆದ ವಿಧಾನಸಭಾ ಚುನಾವಣೆಯ ಸಂದರ್ಭದಲ್ಲಿ ಚುಣಾವಣಾ ಆಯೋಗ ಪರಿಚಯಿಸಿದ ವಿವಿ ಪ್ಯಾಟ್‌ ಯಂತ್ರದ ಮೂಲಕ ಮತದಾರ ತಾನು ಹಾಕಿದ ಮತ ಅದೇ ಅಭ್ಯರ್ಥಿಗೆ ಚಲಾವಣೆ ಆಗಿದೆಯೇ ಎಂಬುದನ್ನು ಪರಿಶೀಲಿಸಬಹುದು. ಈ ಯಂತ್ರದಲ್ಲಿ ಎಲ್ಲ ಅಭ್ಯರ್ಥಿಗಳ ಹೆಸರು ಮತ್ತು ಫೋಟೋ ಅಳವಡಿಸಲಾಗಿರುತ್ತದೆ. ಮತದಾರರು ತಾವು ಚಲಾಯಿಸಿದ ಮತ ಸರಿಯಾದ ವ್ಯಕ್ತಿಗೆ ಅಥವಾ ನಿರ್ದಿಷ್ಟ ಚಿಹ್ನೆಗೆ ಚಲಾವಣೆ ಆಗಿದೆಯೇ ಎಂಬುದನ್ನು ವಿ.ವಿ. ಪ್ಯಾಟ್ ಯಂತ್ರ 7 ಸೆಕೆಂಡುಗಳ ಕಾಲ ತೋರಿಸುತ್ತದೆ. ಇದರಲ್ಲಿ ಬಳಸುವ ಕಾಗದ ಉತ್ಕೃಷ್ಟ ಗುಣಮಟ್ಟದ್ದು. ಐದು ವರ್ಷ ಕಾಲ ಇದರ ಮಾಹಿತಿ ಅಳಿಸಿ ಹೋಗುವುದಿಲ್ಲ. ಹಾಳಾಗುವುದಿಲ್ಲ ಎಂದು ಚುನಾವಣಾ ಆಯೋಗದಿಂದ ಬಂದ ಅಧಿಕಾರಿಗಳು ಸೋಮೇಶ್ವರ ಗ್ರಾಮದ ನಾಗರಿಕರಿಗೆ ವಿವರಿಸಿದರು.ಪ್ರತಿಯೊಬ್ಬರೂ ಈ ಪ್ರಾತ್ಯಕ್ಷಿಕೆಯಲ್ಲಿ ಮಾದರಿ ಮತದಾನ ಚಲಾಯಿಸಿ ಪರಿಶೀಲನೆ ನಡೆಸಿದರು.

ವಿವಿ ಪ್ಯಾಟ್ ಯಂತ್ರ ಕೈಕೊಟ್ಟರೆ?:ಮತದಾನ ಸಂದರ್ಭ ವಿವಿ ಪ್ಯಾಟ್ ಯಂತ್ರ ಕೈಕೊಟ್ಟರೆ ಅದನ್ನು ಮಾತ್ರ ಬದಲಾಯಿಸಲಾಗುತ್ತದೆ. ಒಂದು ವೇಳೆ, ನಿಯಂತ್ರಣ ಘಟಕ (ಸಿಯು) ಅಥವಾ ಮತದಾನ ಯಂತ್ರ (ಬಿಯು) ಕೈಕೊಟ್ಟರೆ ಮೂರು ಯಂತ್ರಗಳನ್ನು ಕೂಡ ಬದಲಾಯಿಸಲಾಗುತ್ತದೆ.ಮತದಾರರು ಅಥವಾ ಸಾರ್ವಜನಿಕರು ಮತಯಂತ್ರದ ಕಾರ್ಯನಿರ್ವಹಣೆ ಬಗ್ಗೆ ವಿನಾಕಾರಣ ಆರೋಪ ಮಾಡಿದರೆ ವಿಚಾರಣೆ ನಡೆಸುತ್ತಾರೆ. ಸುಳ್ಳು ಆರೋಪ ಮಾಡಿದ ವ್ಯಕ್ತಿಗೆ 6 ತಿಂಗಳ ಸಜೆ ಹಾಗೂ ಸಾವಿರ ರೂ. ದಂಡ ವಿಧಿಸುವ ಕಾನೂನು ಜಾರಿಯಲ್ಲಿದೆ. ಒಂದು ವೇಳೆ ಆರೋಪ ಸರಿಯಿದ್ದರೆ ಮತದಾನ ರದ್ದು ಮಾಡಿ, ಮರು ಮತದಾನ ನಡೆಸುವ ಅವಕಾಶ ಇದೆ.

ಸುಮಾರು 50 ಗ್ರಾಮಸ್ಥರು ಭಾಗವಹಿಸಿದ ಈ ಪ್ರಾತ್ಯಕ್ಷಿಕೆ ಕಾರ್ಯಕ್ರಮದಲ್ಲಿ ಸೋಮೇಶ್ವರ ಗ್ರಾಮ ಕರಣಿಕರಾದ ಲಾವಣ್ಯಾ ಕೆ., ಕಚೇರಿ ಸಿಬ್ಬಂದಿ ಗೋಪಾಲ್, ಸೋಮೇಶ್ವರ ಪಂಚಾಯತ್ ಅಧ್ಯಕ್ಷ ರಾಜೇಶ್ ಉಚ್ಚಿಲ್, ಪಂಚಾಯತ್ ಸದಸ್ಯ ಬಶೀರ್, ಸೋಮೇಶ್ವರ ವಲಯ ಕಾಂಗ್ರೆಸ್ ಸಮಿತಿಯ ಅಧ್ಯಕ್ಷ ಬಶೀರ್ ಕೊಳಂಗರೆ ಸಹಿತ ಎಲ್ಲಾ ಪಕ್ಷಗಳ ಕಾರ್ಯಕರ್ತರು ಭಾಗವಹಿಸಿದ್ದರು.