ಕಗ್ಗಂಟಾದ ಪೆಟ್ರೋಲ್ ಪತ್ತೆ ಪ್ರಕರಣ : ನೀರು ಖಾಲಿ ಮಾಡಿದಂತೆ ಮತ್ತೆ ಪತ್ತೆಯಾಗುತ್ತಿದೆ ತೈಲ !

UN NETWORKS

ಉಳ್ಳಾಲ: ದೇರಳಕಟ್ಟೆ ಕಾನೆಕೆರೆ ಮೂರು ಬಾವಿಗಳಲ್ಲಿ ಪತ್ತೆಯಾದ ತೈಲಾಂಶ ಪ್ರಕರಣ ಇನ್ನಷ್ಟು ಕಗ್ಗಂಟಾಗಿದೆ. ಗುರುವಾರ ಮೂರು ಬಾವಿಗಳ ನೀರನ್ನು ಸಂಪೂರ್ಣ ಹೊರತೆಗೆದರೂ ಮತ್ತೆ ಬಾವಿಯಲ್ಲಿನ ಒರತೆಯಲ್ಲಿ ಅಧಿಕ ಪ್ರಮಾಣದಲ್ಲಿ ತೈಲಾಂಶ (ಪೆಟ್ರೋಲ್ ) ಪತ್ತೆಯಾಗಿದೆ. ಬೆಳ್ಮ ಗ್ರಾಮ ಪಂಚಾಯಿತಿ ವತಿಯಿಂದ ನೀರು ಸಂಪೂರ್ಣ ಹೊರತೆಗೆದು ಗ್ರಾಮಕರಣಿಕರು ಬಾವಿ ನೀರು ಜನ ಉಪಯೋಗಿಸದಂತೆ ಮೊಹರು ಹಾಕಿದ್ದಾರೆ.

ನ.13 ರಂದು ಕಾನೆಕೆರೆ ಪ್ರದೇಶಕ್ಕೆ ಜಿಲ್ಲಾ ಉಸ್ತುವಾರಿ ಸಚಿವ ಯು.ಟಿ.ಖಾದರ್ ಭೇಟಿ ನೀಡಿದ್ದರು. ಬೆಳ್ಮ ಗ್ರಾಮ ಪಂಚಾಯಿತಿಗೆ ಬಾವಿ ನೀರು ಸಂಪೂರ್ಣವಾಗಿ ಖಾಲಿ ಮಾಡಿ , ನೀರಿನ ಸ್ಯಾಂಪಲ್ ಅನ್ನು ಎಂ.ಆರ್ ಪಿಎಲ್ ಮತ್ತು ಎನ್ ಐ ಟಿಕೆ ಮುಖೇನ ಉತ್ತಮ ಸಂಶೋಧನಾ ಏಜೆನ್ಸಿಗೆ ಕಳುಹಿಸುವಂತೆ ಜಿಲ್ಲಾ ಆರೋಗ್ಯ ಅಧಿಕಾರಿ ಬಳಿ ಆದೇಶಿಸಿದ್ದರು. ಕಾನೆಕೆರೆಯ ಇಸ್ಮಾಯಿಲ್ .ಕೆ, ಇಸ್ಮಾಯಿಲ್.ಎನ್ ಮತ್ತು ಹುಸೈನ್ ಎಂಬವರಿಗೆ ಸೇರಿದ ಮೂರು ಬಾವಿಗಳಿಂದ ನೀರು ಗುರುವಾರ ಸಂಜೆ ವೇಳೆ ಸಂಪೂರ್ಣ ಹೊರತೆಗೆಯಲಾಯಿತು. ಪಂಪ್ ಮುಖೇನ ನೀರು ಸಿಂಟೆಕ್ಸ್ ಗೆ ತುಂಬಿಸಿ, ಅಲ್ಲಿಂದ ಟ್ಯಾಂಕರ್ ಮೂಲಕ ದೂರ ಕೊಂಡೊಯ್ದು ಸುರಿಯಲಾಗಿದೆ. ಆದರೆ ಬಾವಿಯಲ್ಲಿ ಪತ್ತೆಯಾದ ತೈಲ ಮಿಶ್ರಿತ ನೀರು ಸಂಪೂರ್ಣ ಖಾಲಿಯಾದರೂ, ಮತ್ತೆ ಹೊಸ ಒರತೆಯಿಂದ ತೈಲ ಅಧಿಕವಾಗಿ ಹೊರಬಂದಿದೆ. ಅದನ್ನು ಮೇಲಕ್ಕೆತ್ತಿ ಬಾಟಲಿಗಳಲ್ಲಿ ತುಂಬಿಸಿದಾಗ ನೀರಿಗಿಂತ ತೈಲವೇ ಅಧಿಕವಾಗಿತ್ತು. ಪೆಟ್ರೋಲ್ ದುರ್ವಾಸನೆ ಜೊತೆಗೆ ಕೆಂಪು ಮತ್ತು ಬಿಳಿ ಬಣ್ಣದ ನೀರು ಕಂಡುಬಂದಿದೆ. ಸ್ಥಳೀಯರು ಬಾಟಲಿಗಳಲ್ಲಿ ಸಂಗ್ರಹಿಸಿ ಕೊಂಡೊಯ್ದಿದ್ದಾರೆ.

ಪರಿಸರ ಇಲಾಖೆಯ ಅಧಿಕಾರಿ ಹಾಗೂ ಆರೋಗ್ಯ ಅಧಿಕಾರಿಗಳು ಸ್ಥಳಕ್ಕೆ ಭೇಟಿ ನೀಡಿ, ಮತ್ತೆ ಪತ್ತೆಯಾದ ಹೊಸ ಒರತೆ ನೀರಿನ ಸ್ಯಾಂಪಲ್ ಪಡೆದುಕೊಂಡಿದ್ದಾರೆ. ಆ ಬಳಿಕ ಗ್ರಾಮಕರಣಿಕ ಪೂರ್ಣಚಂದ್ರ ತೇಜಸ್ವಿ ಕಂದಾಯ ಇಲಾಖೆ ಆದೇಶದಂತೆ ಮೂರು ಬಾವಿಗಳನ್ನು ತಾರ್ಪಾಲು ಮುಖೇನ ಕಟ್ಟಿ ಮೊಹರು ಹಾಕಿ ಸ್ಥಳೀಯರಿಗೆ ಉಪಯೋಗಿಸದಂತೆ ನಿಷೇಧಿಸಿದ್ದಾರೆ. ಬೆಳ್ಮ ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ ಅಬ್ದುಲ್ ಸತ್ತಾರ್, ಸದಸ್ಯರುಗಳಾದ ರಝಾಕ್, ಸತೀಶ್ , ಅಭಿವೃದ್ಧಿ ಅಧಿಕಾರಿ ನವೀನ್ ಹೆಗ್ಡೆ ಎರಡು ದಿನಗಳ ಕಾರ್ಯಾಚರಣೆಯಲ್ಲಿ ಭಾಗವಹಿಸಿದ್ದರು.

`ಅಧಿಕ ಪೆಟ್ರೋಲಿಯಂ ರಾಸಾಯನಿಕ
ಇರುವ ವರದಿ ಬಂದಿತ್ತು’ : ಪರಿಸರ ಇಲಾಖೆ
ಬಾವಿಗಳಲ್ಲಿ ಪತ್ತೆಯಾದ ತೈಲಾಂಶದ ನೀರು ಪರಿಶೀಲಿಸಿದ ವರದಿಯಲ್ಲಿ ಅಧಿಕ ಪೆಟ್ರೋಲಿಯಂ ರಾಸಾಯನಿಕ ಇರುವ ಕುರಿತು ವರದಿ ಬಂದಿದೆ. ಇದೀಗ ಮತ್ತೆ ಪತ್ತೆಯಾಗಿರುವ ಹೊಸ ಒರತೆಯ ನೀರನ್ನು ಸಂಗ್ರಹಿಸಲಾಗಿದೆ. ಅದನ್ನು ಜಿಲ್ಲಾ ಆರೋಗ್ಯ ಇಲಾಖೆ, ಎಂಆರ್ ಪಿಎಲ್ ಅವರಿಗೆ ನೀಡಲಾಗಿದೆ. ಮತ್ತೆ ಅದನ್ನು ಪರಿಶೀಲಿಸಿ ವರದಿಯನ್ನು ಸಂಗ್ರಹಿಸಲಾಗುವುದು ಎಂದು ಸ್ಥಳಕ್ಕೆ ಭೇಟಿ ನೀಡಿರುವ ಬೈಕಂಪಾಡಿ ಪರಿಸರ ಇಲಾಖೆಯ ಪರಿಸರ ಅಧಿಕಾರಿ ರಾಜಶೇಖರ್ ಪುರಾಣಿಕ್ ಪ್ರತಿಕ್ರಿಯಿಸಿದ್ದಾರೆ.

ಭೂವಿಜ್ಞಾನ ಇಲಾಖೆ ಭೇಟಿ
ತೈಲಾಂಶ ಪತ್ತೆಯಾದ ಹಿನ್ನೆಲೆಯಲ್ಲಿ ಸ್ಥಳೀಯರ ಆರೋಪದ ಹಿನ್ನೆಲೆಯಲ್ಲಿ ಮೂರು ಬಾವಿಗಳ ಮೇಲೆ ದೇರಳಕಟ್ಟೆ ಜಂಕ್ಷನ್ನಿನಲ್ಲಿರುವ ಪೆಟ್ರೋಲ್ ಬಂಕ್ ಅನ್ನು ಒಂದು ದಿನದ ಕಾಲ ವ್ಯವಹಾರ ಸ್ಥಗಿತಗೊಳಿಸಿ ಬಂದ್ ನಡೆಸಲಾಗಿತ್ತು. ಈ ವೇಳೆ ಓಐಸಿಎಲ್ ಅಧಿಕಾರಿಗಳು ತೈಲದ ಅಳತೆಯನ್ನು ನಡೆಸಿ, ಬಂಕ್‍ನ ಟ್ಯಾಂಕುಗಳಲ್ಲಿ ಯಾವುದೇ ರೀತಿಯ ಸೋರಿಕೆ ಇಲ್ಲದಿರುವ ವರದಿಯನ್ನು ನೀಡಿದ್ದಾರೆ. ಇದರಿಂದ ಬಂಕ್ ಸಮಸ್ಯೆ ಇತ್ಯರ್ಥವಾಗಿತ್ತು. ಆದರೆ ಮತ್ತೆ ಬಾವಿ ನೀರಿನಲ್ಲಿನ ಹೊಸ ಒರತೆಯಲ್ಲಿಯೂ ಪೆಟ್ರೋಲಿಯಂ ರಾಸಾಯನಿಕ ಪತ್ತೆಯಾಗಿರುವುದು ಸ್ಥಳೀಯ ಬೆಳ್ಮ ಗ್ರಾಮ ಪಂಚಾಯಿತಿಗೆ ಕಗ್ಗಂಟಾಗಿ ಪರಿಣಮಿಸಿದೆ. ಈ ನಿಟ್ಟಿನಲ್ಲಿ ಶುಕ್ರವಾರ ಭೂವಿಜ್ಞಾನ ಇಲಾಖೆಯವರು ಭೇಟಿ ನೀಡಿ , ಸೂಕ್ತ ಮಾಹಿತಿ ಸಂಗ್ರಹಿಸಿ ಪರಿಶೀಲನೆ ನಡೆಸಿ, ತೈಲದ ಮೂಲ ಪತ್ತೆಹಚ್ಚಲಿರುವ ಭರವಸೆ ಇದೆ ಎಂದು ಬೆಳ್ಮ ಗ್ರಾ.ಪಂ ಉಪಾಧ್ಯಕ್ಷ ಅಬ್ದುಲ್ ಸತ್ತಾರ್ ತಿಳಿಸಿದ್ದಾರೆ.